På norsk

Lasseartihkkal Sámi skuvlahistorjá 6-girjái. Davvi Girji 2013.

Mari Boine:

Ná dárvanii jáhkku ahte sápmi lei heittot

Mari Boine, Leavdnja 1988
(Govva: Svein Lund)

Mari Boine lea dovddus lávlun, komponista ja teakstačállin. Son riegadii 1956 ja šattai bajás Gámehisnjárggas Kárášjogas. Son váččii Rájá skuvlla ja Kárášjoga nuoraidskuvlla. Sus lea oahpaheaddjioahppu Álttás ja lea bargan oahpaheaddjin Billávuona skuvllas, Porsáŋggus.
1989 rájes son lea leamaš ollesáigeartistan. Son lea almmuhan máŋga skearru, lávlon máŋgga riikkas ja ožžon máŋgabálkášumi, ee, Davviriikkaid ráđi musihkkabálkášumi.

Dát teaksta lei su vuosttaš teavsttaid gaskkas. Son čálii dan juo 1981, ja lávlui dan iežas vuosttaš skearrus Jaskatvuođa maŋŋá. Teaksta lea dá originála čállingielas, nugo prentejuvvui skearru teakstagihpagis.

Go mánná mon ledjen ja skuvlii mon álgen
in gávdnan in sáni go dárostii galgen
ja jalla ja heittot mun iežan mielas orron
go ohppen ahte eatnigiella ii man ge veara lean
:/: Ná dárvánii jáhkku ahte sápmi lei heittot :/:

Go boarrasat šadden ja máilbmái vulgen
in muitalan goasge ahte sápmelaš ledjen
ja čáibmen singuin ovttas geat bilkidedje sámiid
vaikko dovden ahte iežan mon maŋimusat sorden
:/: Ná dárvánii jáhkku ahte sápmi lei heittot :/:

Dál vikkan fas ohcat maid dán rádjái láhppen
i oro mus giella i dáro i sáme
dan dihtii mon rávven du same nuora
váldde vára iežat giela dasgo giella lea fápmu
:/: Ale šat jáhke ahte sápmi lei heittot :/:

Sámi skuvlahistorjá 6