På norsk Trond Trosterud |
Trond Trosterud (r. 1962) lea bajásšaddan Oslos, Hámmárfeasttas ja Roanddimis. Son lea lohkan lingvistihks, davvigielaid, suomagiela, historjá ja matematihka. Son lea oahpahan dárogiela Helssegis, leamaš álgoálbmotkonsuleanta Barentsčállingottis Girkonjárggas ja stipendiahta ja dutki Romssa universitehtas, gos son dál lea sámi giellateknologiija professor.
Trond Trosterud lea čállán máŋga artihkala gielladieđalaš ja sosiolingvistalaš fáttáid birra, erenoamážit suoma-ugralaš gielaid birra, ja ollu artihkkaliid sámegiel ja ođđadárogiel Wikipedias.
|
Lágideddjiid bealis, Giellatekno bealis, muhto maid Romssa universitehta bealis, mun sávan buohkaide bures boahtima dan girjeseminárii dáppe Romssas.
Sámi skuvlahistorjá lea dehálaš Giellateknoi, ja Berit Merete Nystad Eskonsipo čilge didjiide ihttin man dihte lea nu. Muhto Sámi skuvlahistorjá lea maid dehálaš olles universitehtii. Girji, dahje rievtti mielde girjeráidu, lea metodologalaččat áigeguovdil, go narratiiva dutkanvuohki lea ožžon stuorát mearkkašumi máŋga fágain. Girjjit ieža leat maid seammalágan prošeakta go Romssa universitehta lei, namalassii dekolonialiserenprošeakta. Girjjiin sámi skuvlahistorjjá váldooassálastit, oahppit, oahpaheaddjit, internáhtagievkkana bargit, skuvlagirjjiid čállit, ja politihkkarat, besset ieža čilget mo dat duođas lei — sin mielas. Sii besset ieža leat mielde iežaset historjáčállimis.
Mun jáhkán, ahte dan girjeráiddu mearkkašupmi dušše lassána áiggi mielde, nu ahte go čuohte jagi geahčen lea áigi analyseret 1900-logu mearkkašumi sápmelaččaid historjjás, ja Norgga historjjás dáppe davvin, de Sámi skuvlahistorjá lea lunddolaš ja dehálaš oassi dan proseassas.
Mun sávan Sámi skuvlahistorjjá bures boahtin akademiijai ja akademalaš ságastallamii, ja mun sávan universitehta dutkiid bures boahtin geavahit girjeráidu iežaset barggus. Seminára odne ja ihttin lea dasa hui buorre álgu, ja mun háliidan giitit Svein Lund, go lea háliidan, ja lágidan, dakkár seminára, ja Davvi girji, mii lea almmuhan buot girjjiid.
Giitu, ja bures boahtin buohkaide.
