På norsk Seija Guttorm |
Seija Guttorm (r. 1957) lea bajásšaddan Vuovdaguoikkas, Ohcejogas. Sus lea oahpaheaddjioahppu ja humanistalaš kandidáhtaeksámena Oulu universitehtas ja dasa lassin sámegiela gaskafága ja oahpponeavvopedagogihkka. Son lea bargan oahpaheaddjin Ohcejogas ja Kárášjogas. 2003 rájes son lea bargan Davvi Girjjis lágádusdoaimmaheaddjin ja son lea hálddašan Sámi skuvlahistorjá-girjjiid dan rájes. Son lea maid ráhkadan neahttaoahpponeavvu "Fárru", sámi čáppágirjjálašvuođa birra.
|
Sávan buohkaide bures boahtima Sámi skuvlahistorjjá seminárii. Davvi Girji-lágádus ja doaimmahusjoavku háliidit dáinna smeinárain ávvudit girjeráiddu ollašuhttima. Mii leat almmuhan guhtta girjji Sámi skuvlahistorjá ráiddus, ja dán seminára ulbmilin lea sihke muitalit barggu birra mii lea dahkkon, árvvoštallat dan mii leat dahkkon ja oaidnit ovddosguvlui mii vel galggašii dahkkot dán fáttás. Mis lea logaldallamat ja ovdanbuktimat prográmmas, muhto dehálaš lea maiddái ahte mis lea áigi ságastallamiidda, go ságastallamat ja gulahallan dat leat ođđa dieđuid siepmanat.
Seminára lágiiduvvo ovttas Giellateknoin ja mii giitit sin dás.
Deikke leat bovdejuvvon olbmot geat leat mielde dán guđát girjjis ja ovddit girjjiid čállit ja muitaleaddjit, nu ahte mii oažžut dás dakkár seminára mii govve girjjiid luonddu, dahje vuoiŋŋa: namalassii dieđalaš geahčastagat oktiičadnojuvvon olbmuid vásáhusaiguin.
Min stuorámus sávaldat ja doaivva almmatge lea ahte sámi skuvlahistorjjá dutkan ja duođašteapmi ii bázášii dušše dáid pearpmaid gaskii, go mii leat dál loahpahan dán barggu. Mii sávvat ahte earat jotket barggu, ja dan birra dán seminára galgá maiddái leat.
